சோஷியல் மீடியா ரைம்

Posted by: என். சொக்கன் on: December 18, 2011

In: மொக்கை
4 Comments

நங்கையின் பள்ளியில் தமிழ்ப் பாடங்கள் இல்லை. ஆகவே நம் ஊரிலிருந்து ஒண்ணாங்கிளாஸ் தமிழ்ப் புத்தகம் வாங்கித் தந்திருக்கிறோம். இன்று காலை அதில் ஒரு தமிழ்ப் பாடல் / Rhyme (எழுதியவர் பெயர் தெரியவில்லை) எழுத்துக் கூட்டிப் படித்துக்கொண்டிருந்தாள்:

மல்லிகைப் பூவே! மல்லிகைப் பூவே! எங்க போறீங்க?

மஞ்சள் சாமந்தி பூத்துச்சான்னு பார்க்கப் போறேங்க!

சாமந்திப் பூவே! சாமந்திப் பூவே! எங்க போறீங்க?

வெள்ளைத் தாமரை பூத்துச்சான்னு பார்க்கப் போறேங்க!

தாமரைப் பூவே! தாமரைப் பூவே! எங்க போறீங்க?

சிவப்பு ரோஜா பூத்துச்சான்னு பார்க்கப் போறேங்க!

ரோஜாப்பூவே! ரோஜாப்பூவே! எங்க போறீங்க?

பூத்த பூவைப் பறிச்சு உனக்குச் சூட்டப் போறேங்க!

அப்போது அவளுடைய தங்கை கையில் பாதாம் பருப்புடன் ஓடி வர, அதை வைத்து இந்தப் பாட்டின் அடிப்படையில் அவள் ஒரு ‘காப்பி’ப் பாடலை இட்டுக்கட்டிப் பாடினாள்:

பாதாம் மாமா! பாதாம் மாமா! எங்கே போறீங்க?

முந்திரிப் பருப்பு மாமாவத்தான் பார்க்கப் போறேங்க!

முந்திரி மாமா! முந்திரி மாமா! எங்கே போறீங்க?

திராட்சை மாமாவைத்தான் பார்க்கப் போறேங்க!

திராட்சை மாமா! திராட்சை மாமா! எங்கே போறீங்க?

பழம் பறிச்சு நான் உனக்கு ஊட்டப் போறேங்க!

இதை நான் ட்விட்டரில் போட, நண்பர் @balaav குறுக்கிட்டுக் கிண்டலாக ஒரு வரி சொன்னார்:

ட்விட்டர் மாமா! ட்விட்டர் மாமா! எங்கே போறீங்க?

சர்வர் டவுனு ஆனதால நான் தூங்கப் போறேங்க!

இப்படிக் கோடு போட்டால் விடமுடியுமா? ட்விட்டரில் ஆரம்பித்து நானும் ஒரு ‘சோஷியல் மீடியா ரைம்’ நீட்டிவிட்டேன்:

ட்விட்டர் மாமா! ட்விட்டர் மாமா! எங்கே போறீங்க?

ஃபேஸ்புக் ஸ்டேட்டஸ் அப்டேட் செய்ய நானும் போறேங்க!

ஃபேஸ்புக் மாமா! ஃபேஸ்புக் மாமா! எங்கே போறீங்க?

ப்ளாக் எழுத, ஃபீட்பேக் போட நானும் போறேங்க!

ப்ளாக் மாமா! ப்ளாக் மாமா! எங்கே போறீங்க?

ஃபோர் ஸ்கொயரில் மேயராக நானும் போறேங்க!

4ஸ்கொயர் மாமா! 4ஸ்கொயர் மாமா! எங்கே போறீங்க?

கூகுள் ப்ளஸ்ஸில் ப்ரொஃபைல் க்ரியேட் பண்ணப் போறேங்க!

கூகுள் மாமா! கூகுள் மாமா! எங்கே போறீங்க?

நான் எங்கே போவேன், இங்கேயேதான் கிடக்கப்போறேங்க!