மனம் போன போக்கில்

முத்திரை

Posted on: February 15, 2013

போரடிக்கும்போது ஷெல்ஃபிலிருந்து ஏதாவது ஒரு புத்தகத்தை எடுத்து ஏதாவது ஒரு பக்கத்தைப் பிரித்துப் படிப்பது ஒரு சுவாரஸ்யமான பொழுதுபோக்கு. இன்றைக்கு அப்படிச் சிக்கியது, சிலப்பதிகாரம், அரங்கேற்று காதை.

மாதவியின் நாட்டிய அரங்கேற்றத்தைப்பற்றிப் பாடும் இளங்கோவடிகள், அவள் ஆடிய மேடை எப்படி இருந்தது என்று மிக விரிவாகப் பேசுகிறார். அதில் ஒரு வரி:

ஒருமுக எழினியும், பொருமுக எழினியும்,

கரந்துவரல் எழினியும்…

’எழினி’ என்ற பெயரில் சில பழைய அரசர்கள் உண்டு, கேள்விப்பட்டிருக்கிறேன். இப்போதும் அபூர்வமாகச் சிலர் அந்தப் பெயரைத் தங்கள் குழந்தைகளுக்குச் சூட்டுவதாக அறிகிறேன். ஆனால் இந்த வரிகளைப் படித்தபோதுதான் ‘எழினி’ என்ற சொல்லுக்கு என்ன அர்த்தம் என்று தேடத் தோன்றியது.

தமிழில் ‘எழினி’ என்றால் திரை அல்லது திரைச்சீலை என்று அர்த்தமாம். இந்தப் பெயரைக் குழந்தைகளுக்குச் சூட்டும்போதும்கூட, ‘திரை போன்றவன்’, ‘திரை போன்றவள்’ என்றுதான் பொருளாம்.

இளங்கோவடிகள் வர்ணிக்கும் மாதவியின் நாட்டிய அரங்கில் மூன்றுவிதமான திரைகள் கட்டப்பட்டிருந்தன. அவை ஒவ்வொன்றும் வெவ்வேறுவிதமாக இயங்குகிறவை:

  • ஒருமுக எழினி : அரங்கத்தின் இடதுபக்கத்தில் சுருக்கிக் கட்டப்பட்டிருக்கும், இதோடு இணைக்கப்பட்டுள்ள கயிறை இழுத்தால் இடது பக்கத்திலிருந்து வலது பக்கம் சென்று முழுவதுமாக மூடிவிடும், அல்லது திறந்துவிடும்
  • பொருமுக எழினி : அரங்கத்தின் இருபுறமும் சுருக்கிக் கட்டப்பட்டிருக்கும். இவற்றோடு இணைக்கப்பட்டுள்ள கயிறுகளை இழுத்தால், ஒவ்வொன்றும் அரங்கின் ஒரு பாதியை மூடும் (அதாவது, அரங்கத்தின் மையத்தில் ஒன்றாகச் சேர்ந்துகொள்ளும், பின்னர் எதிர்த் திசையில் பிரிந்து வரும்)
  • கரந்துவரல் எழினி : மேடைக்குமேலே சுருட்டிக் கட்டப்பட்டிருக்கும். கயிறை இழுத்தால் கீழே வந்து அரங்கை மூடும், அல்லது திறக்கும்

இந்த மூன்று வகைத் திரைகளையும் நாம் இப்போதும் பார்க்கிறோம், சிலப்பதிகாரம் எழுதப்பட்டபோதே இவை புழக்கத்தில் இருந்திருக்கின்றன என்பதுதான் ஆச்சர்யமான விஷயம்.

குறிப்பாக, ‘கரந்துவரல் எழினி’ என்ற பெயர் மிக மிக அழகானது, பொருத்தமானது.

தமிழில் ‘கரத்தல்’ என்றால் மறைத்தல் அல்லது ஒளித்துவைத்தல் என்று அர்த்தம். ‘கரந்து’ என்றால் ‘ஒளிந்து’, ‘உடல்மிசை உயிர் எனக் கரந்து எங்கும் பரந்துளன்’ என்று இறைவனைப் பாடுவார் நம்மாழ்வார்.

ஆக, ‘கரந்து வரல்’ என்றால் என்ன அர்த்தம்? ஒளிந்திருந்து திடீர் என்று நம்முன்னே வந்து தோன்றுதல். இல்லையா?

ஒரு மேடையில் மேலே இருந்து கீழே வரும் திரை அதைத்தானே செய்கிறது? நிகழ்ச்சி நடக்கும்வரை அப்படி ஒரு திரை இருப்பதே நம் கண்ணில் படுவதில்லை, சட்டென்று எங்கிருந்தோ ஒரு திரை கீழே வருகிறது, அரங்கை மூடிவிடுகிறது.

பின்னர், அடுத்த நிகழ்ச்சி தொடங்குமுன், திரை மீண்டும் சுருண்டு மேலே செல்கிறது, ஒளிந்துகொள்கிறது. இப்படிப்பட்ட ஒரு திரைக்குக் ‘கரந்து வரல் எழினி’ என்ற பெயர் எத்துணைப் பொருத்தம்!

***

என். சொக்கன் …

15 02 2013

Advertisements

12 Responses to "முத்திரை"

அன்புள்ள சொக்கன்,
தமிழை அறிந்து கொள்ள நல்ல செய்தி. எழினி – திரை. இன்று செயல்படுத்துவது முன்னோர் வகுத்த வழிதானே!
நட்புடன்,
வ.க.கன்னியப்பன்

யாழினி…
தமிழ்நாட்டில் இன்றும் புழங்கும் ஒரு பெயர்.

எழிலி, யாழினி போன்றவை ஒலியளவில் ‘எழினி’க்கு நெருங்கியிருப்பினும், முற்றிலும் வேறு அர்த்தம் கொண்டவை என்று நினைக்கிறேன்

எழினி – என்னவொரு அழகான சொல்.

இளங்கோ விவரிப்பதெல்லாம் இன்றைக்கு சினிமா அரங்குகளில் இருப்பதுதான். ஆனா அன்னைக்கே நம்மூர்ல இருந்திருக்கு. அட்டகாசம். அட்டகாசம்.

அருமையான தகவலுக்கு நன்றி சார்.

அருமை அய்யா ..
சுவாரசியமான தகவல்..

நன்றி
சுரேஷ்

என்னது போரடிக்கும் போதா?
ஏங்க, உங்களுக்கு போரடிக்கறதுக்கு நேரம் கிடைக்குதா என்ன?!
உங்களுக்கே கொஞ்சம் ஓவரா தெரியலையா 🙂
அருமையான பதிவு

சிவா கிருஷ்ணமூர்த்தி

கயல் விழியாயினும்
வயதாயின்
எழினி வருமன்றோ!

பார்த்துக்குங்க, உங்கள் பதிவுகளின் விளைவை – விபரீத விளைவு – “கவிதை” 🙂

எழிலான எழினிப் பதிவு!

வெறுமனே திரை-ன்னு சொன்னாப் போதாதா? அது என்ன, திரைச் “சீலை”? Guess?

அதான் தமிழின் அழகு!

ஒரு சீலை (சேலை), எப்படி அவ அழகை மறைத்து, அப்பறமா வெளிக்காட்டுதோ…
அது போல, திரைச்-“சீலை”, காட்சி அழகை மறைத்து, அப்பறமா வெளிக் காட்டும்;

ஒரு நாடகத்தில், காட்சி எம்புட்டு முக்கியமோ, அம்புட்டு முக்கியம் காட்சி மாற்றம்;
அதுக்கு உதவுவதே = திரைச் “சீலை”

* வெறும் சீலை = காதல் நாடகம்!
* திரைச் சீலை = காட்சி நாடகம்!

கரந்து வரல் எழினிக்கு நல்லாப் பொருள் சொல்லி இருக்கீக, கரத்தல் = மறைத்தல்-ன்னு;

//நிகழ்ச்சி நடக்கும் வரை அப்படி ஒரு திரை இருப்பதே நம் கண்ணில் படுவதில்லை,சட்டென்று எங்கிருந்தோ ஒரு திரை கீழே வருகிறது, அரங்கை மூடிவிடுகிறது//

ஆனா, பார்வையாளர்/ நுகர்வோர் பக்கம் இருந்து மட்டுமே பாத்து இருக்கீக; CRM influence:)
நடிகர் (நடிகையர்) சார்பா பார்க்க மறந்துட்டீங்களே!:)

அன்பே சிவம் படத்துல, தெருக் கூத்துல, கமலை அறிமுகப் படுத்துவாங்களே, பார்த்து இருக்கீங்களா?
எடுத்தவுடனே, முகத்தைக் காட்டீற மாட்டாங்க;
முன்னாடி ஒரு பிடி திரை பிடிச்சிக், கொஞ்சம் கொஞ்சமா, மறைவில் இருந்து வருவாரு!

அப்படி…
மறைந்து வருதல் திரை = கரந்து + வரல் + எழினி

ஆளை மறைத்துக், கொஞ்சம் கொஞ்சமா அறிமுகப் படுத்த உதவும் திரை; (கரந்து வரும் Hero)
பின்பு, திரையே மறைவுக்குப் போய் விடுவதால், நீங்கள் கூறியதும் சரியே!

காட்சியின் துவக்கம் = கீழிருந்து மேல் நோக்கி மறையும்;
காட்சியின் முடிவு = மேலிருந்து கீழ் நோக்கி மறைக்கும்;

எழினி/ யாழினி பத்தி யாரோ கேட்டு இருக்காக!

* எழில் + நி = எழினி = அழகான பொண்ணு/ பையன்
* எழு + னி = எழினி = எழுவதால்; திரைச் சீலை

ஆனா வேர்ச்சொல் என்னமோ, “எழு” தான் ரெண்டுத்துக்குமே;
அழகான ஒன்னைப் பார்த்தால், மனசு “எழு”ம்பும் = எழில்;
இங்கே நாடகத்தில், திரை எழும்பும் = எழினி

இதே போல் கீழே இழுப்பதால், “இழினி”-யும் உண்டு;
முருகனின் பழமுதிர் சோலையை, “இழும் என இழி தரும் அருவி” -ன்னு பாடுவாரு முருகாற்றுப்படையில்; இழுனி;
——–

திரைச்சீலை/ எழினி-ன்னா, ஆர்.எஸ்.மனோகர் தான் ஞாபகத்துக்கு வராரு;

இப்பல்லாம், சினிமாவே ’விஸ்வரூபம்’ ஆகி விட்டதால், காட்சி மாற்ற உத்திகள் has gone to Camera;
ஆனா, Camera வுக்கும் முன்னோடி = திரைச் சீலைகள்; இதன் பெரும் பங்கு பத்தி தெரியாமவே போயிருச்சி:(

கிராமத்தில் இருந்து சென்னைக்குக் குடி வந்த போது, அப்போ ஒரு சின்ன புள்ளைக்கு உண்டான ஒரே மன நிறைவு = ஆர்.எஸ்.மனோகர் நாடகங்கள்;
இந்தத் திரைச் சீலைகள், சும்மாப் பட்டைய கெளப்பும்!

ஒரு பக்கம், அனுமாரு வைக்குற நெருப்புத் தீ, பாதி அரங்கம் பத்திக்கிட்டு எரியும்;
மறு பக்கம், இராவணன் வைக்குற காமத் தீ, இன்னோரு பாதியில் காட்டுவாங்க;

எப்படித் தான் அம்புட்டு வேகமா, திரையை மாத்தி மாத்தி நகர்த்துவாங்களோ தெரியாது, Editing of Lenin Touch, u can see in these stage plays!
May be RS Manohar can be termed “over acting”:) but the screen & editing speed is a big wow!

Therez an extra எழினி in Chilapathikaaram = “ஓவிய எழினி”

இப்பல்லாம் நம்ம வீட்டு Curtain-களில் கூட ஓவிய எழினி வந்துருச்சி:)

திரைச்சீலைகளில், ஓவியங்கள் வரைஞ்சி வைப்பதும் உண்டு;
Stage Backdrop/ Background -ன்னு, சோலை/ அரண்மனை, இதுக்கெல்லாம் ஓவிய எழினி பயன்படும்;

முழு நீளம் இருக்கணும்-ன்னு அவசியம் இல்லை; இடுப்புக்கு கீழே வரைக்கும், மேலே வரைக்கும் -ன்னு short screens போன்ற அளவுகள் உண்டு;

பாஞ்சாலி நாடகத்தில், துகில் உரியும் போது, ஒரு பெண் நடிகையை, எப்படிப் பாதித் துணி அவுந்தாப் போலக் காட்டுறது? (அட, அந்தக் காலத்தில் இடக்கர் அடக்கல், அவை-இல்-கிளவி, அவை-இல்-காட்சி ல்லாம் உண்டே:))

அப்போ, நடிகையின் ஒரு பாதியை, ஓவிய எழினியால் மறைச்சீருவாங்க; சீலை இழுப்பது மட்டும் தெரியும்:)
———-

* ஒருமுக எழினி = one sided; இடம்-வலம் ன்னு போய் வரும்;
* பொருமுக எழினி = Two sided; பாதி பாதியாகப் பொருந்தும்;

* கரந்து வரல் எழினி = பாத்திர அறிமுகத் திரை! மறைத்துக், கொஞ்சம் கொஞ்சமாய்க் காட்டும்; Used in தெருக்கூத்து also;

வட்டமான அரங்கில், மேடையை மறைக்காம, பார்வையாளர்களை மறைக்கும் திரைகளும் உண்டு:) = சூழ் தரல் எழினி!
———-

கம்ப ராமாயணத்தில் கூட “எழினி” உண்டு; Dance Drama of Mayil; கம்பனைக் கண்டு பிடிப்பது உங்க பாடு:) நான் இளங்கோ போற்றுதும்:)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Disclaimer

The opinions expressed here are the views of the writer and do not necessarily reflect the views and opinions of the Organization He works for / belongs to.

இங்கே உங்களுடைய மின்னஞ்சல் முகவரியைத் தட்டிவிட்டால், இந்த வலைப்பதிவில் புதுக் கட்டுரைகள் வெளியாகும்போது அவை உடனுக்குடன் உங்கள் ஈமெயிலில் வந்து நிற்கும்

Join 504 other followers

என் மற்ற வலைப்பதிவுகள்

என் புத்தகங்களை வாங்க … (விளம்பரம்)

கொஞ்சம் பழசு

ஹையா, ஜாலி ஜாலி!

இதுவரை

  • 429,361 வருகைகள், நன்றி!

365பா

நான் தொடர்ந்து எழுதிவரும் இன்னொரு வலைப்பதிவு:

ட்விட்டரில் என்னைப் பின் தொடர்க (ஆஹா, இதுவல்லவோ தமிழ்!)

திரட்டிகள்





Tamilish

For தமிழ் People



தமிழில் எழுத உதவும் எளிமையான, இலவச மென்பொருள்கள்

February 2013
M T W T F S S
« Jan   Mar »
 123
45678910
11121314151617
18192021222324
25262728  
%d bloggers like this: